God jul og godt nytt år frå Saftkokaradn!

Vi startar med å takke våre sponsorar og støttespelarar: De er uvurderlege for oss!

-        Hertz: Også i år gjorde samarbeidet med Hertz at me kunne reise på nokre kampar. Takk!

-        Sparebanken Vest: Me har god rente på sparekontoen vår der. Takk!

-        AMFI: Takk for lån av lokale til julebordet vårt og for lagerplass. Takk og for bidrag til tifo-utlegg og quiz-premie!

-        Meny, Monter og Joar Solberg Trafikkskule: Takk for bidrag til reisekassa!

-        Støtte har og vore Sogndal Bilpleie, Gasta, Gosh PGP og Sogndal fotball (rabatt i bui). Takk!

-        Sist og ikkje minst, takk og til våre grasrot-bidragsytarar via Norsk Tipping!

Sogndal FK Damer:

Vi tek like godt til med det mest positive i år og. Vi er supporterklubben til Sogndal FK Damer. Jentene leverte i år også. 3.plass i 2. div kvinner avd. 2 er bra. Det smakte litt ekstra godt at Frigg er bak. I år fekk damene gjennomført sin treningsleir i solfylte Spania og ikkje som i fjor trene på regntunge arenaer nær Bergen. Vi fekk ikkje gjennomført så mange borteturar som vi ønskte, men hadde fleire fine opplevingar saman. Og som vanleg veldig god dialog med leiing og trenarapparat. Og vi blir takka av spelarane etter kamp. Vi kjenner oss ønkst når vi stiller opp og heiar og set pris på dette.

Før alvoret tok til var det i april eit ok avspark-arrangement på hotellet der damene og var stjernene. Sogndal FK Damer stilte heilhjerta opp og Sogndal Fotball var jo der. Vi supporterane er glade for at vi har avsparka. Det er eit tiltak som saman med informasjonsmøte, utadretta aktivitet og open dialog er viktig for at folk skal kjenne både kultur, klubbleiarar og spelarar.  

Sogndal Fotball:

Det positive her var som i fjor samarbeidet med klubben. Styret vart invitert til Gol i januar, på avspark og hadde samarbeidsmøte med klubben. Vi hadde også ganske god dialog direkte undervegs i sesongen. Trass uro. Under Lerum Cup bidrog me med dugnad gjennom heile turneringa. Vi set pris på at me fekk lov til å lage tribunestemning med tifo, konfetti og pyro gjennom deler av sesongen. Eit stort pluss i år var arrangementa før kamp på Skraol.

Vi tek fort unna det sportslege: IKKJE GODT NOK! Verken av A-laget som stråla i vårsesongen og kollapsa på hausten. Eller av 2.laget som ikkje rykte opp frå 4.divisjon. Etter ei poengtapsrekkje vi tidlegare i historia vår ikkje kan minnast, og eit lite imponerande august-overgongsvindauge, var det lov å vente at vårt miljø målbar uro og misnøye med stoda her på nettsida og i våre kanalar. På dei nasjonale laga presterte talenta langt betre, og lokale spelarar fekk bra med speletid på A-laget, så det ER god talentutvikling i klubben. Baidoo var årets spelar og han var oftast verd inngangspengane åleine før rekord-salet.

Breiddelaga var gode og Sogndal United tapte aldri ein kamp. Me bryr oss!

Juniorsvingen vår har også i år vore gode! Dei er alltid det. Tonje og gjengen har levert bra!

Saftkokaradn

Vi starta som vanleg på fellessamlinga på Gol i januar med møte med leiinga i Sogndal Fotball. På våre eigne møte i styret planla vi sesongen. Vi hadde og samarbeidsmøte med Sogndal Fk Damer. Me var særs godt representert på NSA-helga i Oslo. Helga vart fylt med diskusjonar internt og med NFF og NTF-leiinga.  SK/SLO hadde eigne møter. Me har framleis våre representantar med i NSA (Vidar Vadseth og Therese). Vi har hatt fleire videomøte direkte med NFF- og NTF-leiing undervegs i 2024. Vi bidrog med kort innlegg på Sogn Næring sitt "velkomen til Sogndal". Vi hadde eit godt og ope årsmøte på våren før første heimekamp. Me har også i år og vore aktive på sosiale medium. Styret fungerer godt. Valnemnda Bente og Vidar og. Øyvind og Martin har roller i klubbstyre og klubb som vi meiner vi har diskutert og handtert bra. Vi nådde vårt rekrutteringsmål godt i 2024 med over 165 medlemmar. Vi stilte opp også i motgongsperioden til A-laget og ga det vi greidde av støtte. Og vi stiller med regnbogeflagg på tribuna alle månader i året. Vi er nasjonalt eit av dei betre supportermiljøa til å støtte damene. I alle fall under toppserie-nivået.

Nyttårsønskje?

Vi brenn sjølvsagt for at Luis Pimenta og co skal lukkast i 2025. I det minste må vi kjempe om kvalik. Vi trur på at 2.laget skal rykke opp og at Sogndal FK Damer skal nå si målseting. Vi ventar at måla blir tydelegare formidla i 2025. Vi ønskjer å få halde fram med tett dialog, sjølv om vi ikkje alltid er samde og må ta ordet offentleg og no og då. Vi i styret er td. enno usamd med fleirtalet på sist årsmøte i SF om VAR. Og vi ønskjer tribunestemning som engasjerer unge til å stille opp. Vi ser fram til ei ny kampdrakt i 2025 som vi håpar har reinare Sogndal-fargar. Det blir ei førebuing til 2026. Då er det jubileum både for oss og for SF.

God jul og godt nytt år!

Vyrdsamt

Styret

Øyvind, Sondre, Therese, Martin, Svein Helge, Sindre og Sivert