Jule- og nyttårshelsing frå styret!

Gode medlemmer, støttespelarar, medsupporterar og alle i Sogndal FK Damer og Sogndal Fotball.

Vi er takksame for mykje vi opplevde i lag med dykk i år og. I denne helsinga har vi berre plass til nokre hovedpunkt. Høyr gjerne podcasten Stao no pao på Spotify, Apple podkast og YouTube i romjula for å få med alt og gå i djupna på tema som sport, klubbdrift og support.

Takk til deg som er ein av våre over 100 medlemar i Saftkokaradn! Vi verdset at du bidreg så godt du kan, både på Fosshaugane, på tur, på dugnad, med sympati for support og med ditt engasjement for fotballen!

Takk til våre støttespelarar! Vi er særs takksame for at Hertz Sogndal gav oss ei unik avtale i år. Den var så god at det vart ekstra mange organiserte borteturar for å støtte både herrar og damer. Dette vart og mogeleg fordi gode støttespelarar dekka mykje av nokre turar. Så tusen takk til Sparebanken Vest og Meny! Vi presterte ganske bra tribuneliv også på nokre bortekampar. Støtta dykkar betydde noko og vi trur damene var bra nøgde då vi som 12.(mann) dominerte lydbildet frå eit par bortetribunar. Ei takk og til alle som i 2022 valde oss som grasrotandelen til Norsk Tipping. Dette gjev oss eit økonomisk fundament for å vere aktive supporterar i 2023 og. Takk og til Amfi Sogningen, som leiger oss Kokarbui. Intersport Sogndal er ein støttespelar vi har verdsett i mange år. Våre medlemmar får rabatt. I 2023 vert det helgekampar og lettare å gjere ting i lag. Då kan vi ha meir ope på Kokarbui vår og. Vi har og eit godt samarbeid med Gosh PGP om småartiklar som supplerer Intersport sine produkt til vårt utval, utan at det konkurrerer. Nettsida Gasta leverte for lengje sidan har vi enno glede av. SubWay gjev og våre medlemmar rabatt.

Takk til den nye fotballpuben! Vi er særs takksame for at Fjøra pub har satsa knallhardt som fotballpub med store investeringar for å kunne vise fotball. Særleg viktig er det at ein utestad viser Sogndalskampar når ein ikkje kan vere med på tur. Her håpar vi fleire blir med oss neste år. Tusen takk for at vi fekk engasjert og god dialog og samarbeid med både Anniken og Erlend, midt oppi alt som skjedde rundt opninga og etterpå. Og særleg takk for at de tok grep og arrangerte oppvarminga til det store derbyet i år. Strålande gjennomføring! Det var det og av alle på tribunene under kampen.

Takk til alle som kom på Fosshaugane for å oppleve på kampane og kampstemninga direkte. For ei stemning og eit show det var under Brann-kampen! Det på indre bane då treng vi ikkje snakke meir om. Då sølvet vart sikra mot KFUM i siste runde var det tribunestemning for jentene og.

Takk til juniorsvingen vår. Saftkokaradn i lære (SIL) leverte!

Takk til både Sogndal FK Damer og Sogndal Fotball! Takk for at vi fekk direktedialog med samarbeidsmøte og avklaringsmøte når det var behov for det. Året starta godt på den tradisjonsrike Golsamlinga tidleg i januar. Der er vi invitert med og kan utarbeide våre planar for året og diskutere samarbeid i eige møte med klubbleiinga. Ja, vi fekk bli godt kjent med og diskutert eit og anna viktig med spelarane og. Flott at vi fekk følgd opp den gode starten med fleire samarbeidsmøte til ila året. Vi har kome langt i å utvikle oss saman. Vi har same mål og er samde om mykje, men sjølvsagt ikkje alt. Heldigvis var 2022 på nokre område mindre utfordrande enn 2021. Det kom og eit par saker med usemje på bordet i 2022. Men det var saklege diskusjonar. Vi stiller på Gol igjen og håpar å utvikle begge samarbeida vidare i 2023. Dette var vår første sesong som supporterklubb for Sogndal FK Damer. Det var ein god start og vi forventar utvikling. Ei heftig avsparkshelg med oppladning og blest før sesongen knytt til cup-kampen mot Lillestrøm bør vi få til! Då kan vi kanskje og sjølve arrangere vårt årsmøte.

Litt takk og til media. De fer ganske fint fram mot oss. Og de formidlar mykje om det vi brenn for. Takk til både Sogn Avis, Porten, NRK og eldsjeler for lokalfotballen som Stig Høynes (www.haugenfotball.no), Siri Andresen (lurifaxsupport.no) og Kent Fimreite (Hallo Sogn- streaming). Vi stiller opp når vi kan og håpar ein samla kan bli enno flinkare til å bygge opp stemning og informere i forkant av kampane. Det hadde vore fint og om dei spennande kampane og talentutviklinga vår i nasjonal serie og på andrelag fekk god dekning i 2023. Vi slo faktisk Bodø-Glimt og Rosenborg på Fosshaugane i 2022! Vi gjer eit unntak frå å ignorere hovedstadspressa i år og sender ein takk til VGTV. Initiativet deira let Olav Stedje, Ylvis og Kjartan Lauritzen revitalisere det musikalske arvesølvet vårt på sin unike måte. Vi er ellers godt nøgde med Norsk Supporterallianse, som vi er medlem av. Der har vi med Vidar som leiar og Therese i valnemnda og der vert det jobba godt. Vi ser gjerne nye Nytt på nytt-høgdepunkt med Tonje i sitt ess som i 2021 og nye musikalske stunt i 2023!

Ein særleg takk til spelarane! Det er jo dykk vi er her for. Vi håpar, trur og drøymer om prestasjonar, opplevingar og opprykk i 2023. Og vi meiner mykje om mange. På herresida var vi ikkje heilt nøgde i år heller, trass tidvis fine opplevingar og teikn på utvikling. Det var kjekt på tribuna i Bergen og mot Stabæk heime. Det kan ta tid å bygge nytt. Men på dame- og talentsida leverte de glimrande i 2022.

Supporterar er sjeldan samde. Trøkk og diskusjon prega av erfaring og kjensler skal her vere. Vi stiller på att neste år og håpar sjå DEG på Fosshaugane. Dette er ein invitasjon og ikkje ei forventning. Det kjem opplevingar du ikkje vil gå glipp av også i 2023. Stao no Pao!

Med dette vil vi ønskje dykk alle ei god jul og eit godt nytt (opprykks)år.

Helsing frå Tonje, Therese, Martin, Sondre, Sindre, Geir-Marcus og Øyvind

Tekst: Øyvind Heimset Larsen Bilete: Sogndal Fotball, Sogndal FK Damer og Therese Langeland