Seier for Sogndal FK Damer!
Sogndal FK damer har vunne sin fyrste offisielle heimekamp! Det vart ein tett og spennande kamp som enda med fortjent seier!
I den fyrste omgangen var det Frigg som hadde mest ball og skapte dei største sjansane. Keeper Maia Lindesteg Øen måtte i aksjon fleire gonger og leverte fleire kjemperedningar. Mot slutten av omgangen klarte Sogndal å spele seg meir inn i kampen og fekk betre kontroll. Rett før pause snappa Anna Grindhaug ballen, utfordra inn i 16-meteren og vart felt. Straffe til Sogndal, som Marte Hovland skulle ta. Det gjorde ho feilfritt og satte ballen kontrollert i mål. 1-0 til pause og ein perfekt omgang.
Rett etter pause kom utlikninga. Ein feil i forsvaret til Sogndal gjorde at Frigg kom igjennom mot mål. Keeper Maia Lindesteg Øen var uheldig og mista ballen etter å ha redda det fyrste forsøket slik at Kaja Bjørkvold fekk ei enkel oppgåva med å scora. 1-1.
Etter dette var det heimelaget det handla om. Sogndal trøkka til og pressa Frigg heile vegen. Med god hjelp frå Saftkokaradn bak mål stressa dei Frigg til å gjera feil, og fekk uttelling for da. Etter omtrent ein time spelt vann dei ballen høgt i bana. Marte Hovland storma mot dødlinja og la eit perfekt innlegg til Andrea Sælid Njøs i feltet. Ho satte ballen enkelt i mål på fyrste touch. 2-1 og fortjent ledelse!
Heilt mot slutten av kampen fekk Frigg eit par gode moglegheiter. Sogndal hadde også nokre farlege sjansar som kunne enda med mål, men det enda 2-1. Eit veldig sterkt resultat mot eit rutinert lag som er forventa å kjempe i toppen. No står Sogndal med 6 poeng og 7-1 i målforskjell etter to kampar!
Det vart rett og slett ein veldig flott dag på Fosshaugadn med flott vær, bra stemning på tribuna og seier. No er neste kamp borte mot Loddefjord i cupen allereie på onsdag. Siri «Lurifax» reiser og skal dekke kampen for oss! Neste søndag, 8. mai, klokka 12.00 spelar dei neste heimekamp. Då kjem Snøgg på besøk til Fosshaugadn! Bli med på tribuna og skap stemning. Dette var kjekt! Stao no Pao!
Resultat, tabell og anna info finn du her