Bli kjend med ein saftkokar! - John Oddvar Vinda
John Oddvar Vinda vart fødd 19. november 1961. Han kjem frå Indrebygdi, eller Indre Hafslo om du vil. Han har vore medlem av saftkokaradn i 2-3 år no, og er ein ivrig supportar. Vidare kan du lesa om John Oddvar sitt supportarliv og om kva han gjere på utanom fotballen.
Kven er din favorittspelar i dagens tropp? Og kvifor likar du han?
- Martin Ove Roseth. Han er ein kjempegod vingback og stoppar som legg ned utallige meter gjennom kampen.
Kven er din favoritt Sogndalspelar nokon gong? Og kvifor?
- Svein Bakke. Han hadde utrulege bevegelsar som fekk motstandaren til å føla at han stod i ro.
Som Sogndalsupportar er det mange oppturar og nedturar. Ein får oppleve mange gode, men også dårlege minner.
Kva er ditt beste minne med Sogndal?
- Det må vere cupåret 1976. Heilt utruleg kva den gjengen fekk til, og det vart krona med eit NM-sølv etter tapet mot Brann! Heroisk innsats, men scoringa til Knut var ikkje nok.
Kva er ditt verste minne med Sogndal?
- Må vere playoff om å behalde plassen i Eliteserien 2017. Der me vann 1-0 i fyrste kamp mot Ranheim. I returmøte tapte me 1-0 og dermed vart det straffekonkurranse som me tapte 5-4 og rykka ned.
Det er nok noko som sit igjen hjå dei aller fleste som er glade i Sogndal. Den kalde desemberkvelden i 2017 er vanskeleg å gløyma med det fyrste. Då er det betre å fokusere på dei fine minna.
Kva er ditt beste fotballminne generelt?
- Brann - Sogndal i 2015 då resultatet vart 0-4 og heimefansen bua ut sine eigne spelarar.
Kva er det fyrste minnet du har med Sogndal?
- Det er ikkje ein spesiell kamp, men alle dei gode stundene på bjørkesida på gamle Fosshaugane gløymer eg ikkje.
Kva er den største stadionen du har besøkt?
- Er ikkje så bereist på bortekampar, så Brann stadion er den største for meg og den er grei å vere på! Eg blir vel kanskje utestengt frå kokaradn når eg røpa at Brann var favorittlaget mitt før Sogndal kom opp i toppen. Det å få synga nystemten og kjenne følelsen av felleskap er ubeskriveleg!
Slapp heilt av John Oddvar, me er berre veldig glad for at du valgte riktig lag til slutt!
I dag bur John Oddvar i Gaupne. Han jobbar som lagerarbeidar hjå Neumann på Kaupanger då han måtte gje seg som snikkar i 2012 etter eit fall frå eit tak. Utanom fotballen driv han mykje med dugnad og frivillig arbeid. Han er eit skikkeleg “ja-menneske” som er medlem i tre idrettslag, med i vakttenesta i Sogn, syng i kor og er støttekontakt 3 timar i veka.
Tusen takk til John Oddvar! Stao no Pao!