Julehelsing frå styret!
Då har det vorte desember og jul igjen. Sesongen er ferdig, kvalifiseringa er avgjort og no har norsk fotball tatt juleferie.
Sesongen i år vart diverre ikkje slik me hadde håpa på. Mykje skadar, dårlege resultat og mange skuffelsar enda med 6. plass på tabellen og tap for KFUM Oslo i den fyrste kampen i kvalifiseringa. Halvvegs i sesongen vart det klart at Eirik Bakke etter 7 sesongar ikkje lenger skal vere trenar for Sogndal. Han avsluttar då sin fyrste periode som hovudtrenar og er no den trenaren som har sete lengst samanhengande som trenar for Sogndal. Det vart eit opprykk, to sesong i eliteserien, eit nedrykk og fleire sesongar der me kjempa om opprykk til langt utover hausten. Me takkar Eirik for innsatsen, og dei gode minna.
Gjennom sesongen har me kåra månadens Sogndalspelar. Dei ulike vinnarane er: Kristoffer Hoven, Per Egil Flo, Renze Fij x2, Eirik Lereng og Kristoffer Nessø. No etter sesongen kåra me også årets spelar, og den som fekk flest stemmer var Renze Fij! Han får ein flott glasstatuett frå oss i Saftkokaradn. Bilder frå prisutdeling og intervju med vår nederlandske keeper kjem på nyåret når koronasituasjonen tillet dette. Me er glade for at Renze har signert ny kontrakt med klubben og at han blir verande i Sogndal!
2021 er eit jubileumsår for Saftkokaradn. Det er 20 år sidan me vart stifta og det som skulle bli eit skikkeleg festår vart diverre påverka av covid-19 i større grad enn me håpa på. I starten av sesongen var det ikkje tillate med bortesupportarar. Etterkvart som det opna opp stilte me sterkt på tribuner rundt omkring i landet. Gjennom sesongen arrangerte me totalt 6 borteturar, og me vil gjerne få takke alle som har vore med på desse. Utan at de stiller opp og blir med klarar me ikkje å få det til, så det set me stor pris på.
No i desember hadde me planlagt jubileumsfest der me skulle feira 20 års jubileum. Det vart diverre utsatt, og me gjennomførte eit litt enklare julebord istaden. Det vart eit vellykka arrangement og ein fin avslutning på sesongen. Jubileumsfesten vert utsatt til 2022, og det kjem meir informasjon når det er fastsatt. Då satsar me på at det vert ei flott markering som mange vil delta på. Ein kan sjå fram til gode historiar, mange flotte minner og fleire gjester. Dette vert kjekt!
No er det ein liten pause for både spelarane og oss supportarar, men om ikkje lenge begynner me å sjå framover mot ein ny sesong. Det vert tidenes OBOS-liga med fleire gode lag, der det er mange som har ambisjonar om å kjempe i toppen. Me får inn Tore André Flo som ny trenar frå 1. januar, og gledar oss til å sjå kva han kan få til som trenar. Framover vil me halde dykk oppdatert på nye ting som skjer rundt laget og klubben, så følg med! Det er mykje spennande på gang inn mot neste sesong, og me gledar oss til å gå på med ny energi inn i det nye året.
Heilt til slutt vil me få ynskja alle ei riktig god jol, og eit godt nytt år! Ta vare på kvarandre, og ha ei fin jolefeiring. Me håpar å sjå så mange som mogleg på Fosshaugane i 2022 og at det vert eit år fylt med masse glede og gode opplevingar!
God jol og godt nyttår! Med venleg helsing styret i Saftkokaradn.