Fantastisk stemning og viktig poeng!

Bortekampen mot Brann enda med eit veldig sterkt poeng og ein fantastisk tribunestemning! Sogndal fekk ein veldig god start på kampen. Dei fyrste 20 minutta skapte me mykje sjansar og hadde overtaket på Brann. Den største sjansen vår kom ved Nessø. Etter flott spel fekk Nessø avslutta. Ballen gjekk i stolpen og tilbake til Dyngeland i målet. Utover i omgangen overtok Brann meir spel og sjansar. Til slutt skulle dei få uttelling. Niklas Castro slo eit godt innlegg til Vegard Moberg. Han styrte ballen mot mål og akkurat så hardt at Renze ikkje fekk avverga. 1-0 til heimelaget til pause, i ein omgang der det var veldig gjamnspelt og me burde scora.

Andreomgang starta med press frå Brann før me sakte men sikkert overtok initiativet. Når det var spelt omtrent 70 minutt vart Ulrik Mathisen felt av Mathias Rasmussen som fekk sitt andre gule kort. Utvisning, og andre kamp på rad der Mathisen har vore årsaka bak. Utover omgangen var det bortelaget som var klart best. Sjansane vart større og fleire. I det 70 og i det 76 minutt kom Peter Godly Michael og Jonatan Jonsson inn. Det var dei som til slutt skulle sikra uavgjort. Ballen vart spelt inn til Michael som vendte om og tuppa ballen vidare til Jonsson. Han plasserte ballen på eit touch i det venstre hjørna og i mål. Fullt fortjent 1-1. Etter målet hadde me eit par store sjansar der me fort kunne tatt med oss alle tre poenga.

Totaltsett eit fortjent og bra resultat for oss. Me tek eit veldig sterkt poeng i ein tøff bortekamp igjen. Det kjekkaste ein tek med seg er den enorme støtta og stemningen på tribuna. Bortefeltet var fylt opp av 761 supportarar som laga ei nydeleg ramma rundt kampen! Tusen takk til alle som møtte opp og gjorde da her til ei god oppleving for både spelarar, trenarar og andre supportarar! Stao no Pao!