Bli kjend med ein saftkokar! - Siri Andresen
Siri “Lurifax” Andresen vart fødd 16/07/1990 og vart medlem i Saftkokaradn når ho fylte 18 år. Gjennom mange år som supportar har ho opplevd mykje i eit liv fylt av fotball. Vidare får du moglegheiten til å bli litt betre kjend med Siri og livet hennar som fotballsupportar.
Kva er din favorittspelar i dagens tropp?
- Eg synst alle er like gode på kvar sin måte, så heile gjengen. Ingen nevnt, ingen glemt!
Kva er din favorittspelar nokon gong?
- Mats Solheim, Ulrik Flo og Taijo Teniste
Ein trio som igjennom mange år var gode både på og utanfor bana. Mats Solheim kom til Sogndal i 2006 og spelte 113 kampar før han vart solgt til Kalmar etter 2011-sesongen. Ulrik Flo spelte hjå oss i to periodar, 2007-2015 og 2018-2019, og var ein spelar som da var lett å bli glad i. Taijo Teniste kom til Sogndal i 2011 på lån frå Levadia Tallinn, før han vart kjøpt før 2012 sesongen. Han var nok ein av våre mest stabile spelarar, og leverte sjeldan ein dårleg kamp i løpet av totalt 164 kampar for klubben. Før 2018-sesongen gjekk han vidare til Brann og Bergen.
Kva er ditt beste minne med Sogndal?
- Har mykje fine minner men opprykket i 2010.
Kva er ditt verste minne med Sogndal?
- Mjøndalen kampen i 2020.
Den fantastiske 2010-sesongen, som vart krona med opprykk og fyrverkeri på Fosshaugane Campus, etter kampen mot Fredrikstad er det ikkje vanskeleg å hugsa. Sogndal rykka direkte opp etter å ha vunne Adeccoligaen framfor Sarpsborg 08 og nettopp Fredrikstad. Per Egil Flo, som i dag er Sogndalkaptein, var med å rykke opp den gangen. Kanskje kan me håpa på at me 12 år seinare kan jubla for opprykk igjen, med Flo både på bana, og på sidelinja.
Kva er ditt beste fotballminne generelt?
- Har mange fine minner men for å nemna eitt må eg sei eventyret med G19 gjengen.
Eventyret i 2018 med juniorane våre som overraska alle, og vann både NM og Skandinavisk Cup var stort. Dette sikra også plass i UEFA Youth League slik at Sogndal fekk oppleva to europeiske kampar under flomlysa på Fosshaugane Campus. Rett og slett noko historisk og fantastisk som absolutt står igjen som eit godt minne.
Utanom interessa for Sogndal har Siri ein stor lidenskap for fotball. Ho jobbar som sportsjournalist og driv facebooksida og YouTube-kanalen: Lurifax Support. Ei facebookside med over 1700 følgjarar og ein YouTube-kanal med 218 abonnentar. Ho reiser rundt i heile Norge og filmar og legg ut kampar i alle forskjellige klassar og nivå. Om du lurar på eit resultat i lokalfotballen er Lurifax Support den rette plassen å leite. Utanom jobben likar Siri å trene, spele fifa og strikka. Ein gong strikka ho faktisk hua til heile A-laget til Sogndal (sjå biletet øverst i saka). I dag bur ho på Leikanger og ho er ofte på både heimakampar og med på bortetur.
Tusen takk til Siri! Stao no Pao!